ادرس الرياضيات بطريقة سهلة جدا من موقع تعلم معنا

 

ادرس الرياضيات بطريقة سهلة ❤

▪︎طريقة دراسة الرياضيات  بطريقة سهلة و حكيتلكم ياها بالعامية ان شاء الله كون ساعدتكم بشكل أسرع 💚

 

☆رح نقدملكون طريقة لدراسة الرياضيات

هلا نحني بنعرف أنو الرياضيات قسمين✌️: ☝️نظري🤞تمارين ومسائل

 

♡بالنسبي #للنظري : جدا مهم و من الواجب انو تقروه وأنا شخصيا كنت احفظو ولكن ما حفظ بصم متل العلوم ع الكلمي لا حفظ عن فهم يعني المهم احفظ الفكرة واقدر وصلها لغيري (لان بعرف ما رح يجيني نظري لهيك احفظوا منشان يكون عندي قاعدة بيانات قوية اعتمد عليها في اثناء حل للتمارين) يعني من الاخير النظري بعينك ع فهم التمارين وليش صارت كل خطوي

♡بنجي للتمارين والمسائل : هدول مافي اكتر منون بكتابنا رح صنفهون ل تلت أصناف

☝الأول: ( الأقل أهمية )المسائل يلي بنهاية كل وحدي ويلي الاساتذي ما بقربوا عليا او غالبا بيحذفولكون ياها او بقولي ما مهمي او البعض ليبري ذمتو ببقلكون اقروا لحالكون(هي المسائل بتتركوا لاخر شي مو انو ما تقروا اقروا بس اخر شي لان في ترتيب اولويات يعني ان لحقت تقراها ممتاز ما لحقت بتكون عملت اللي عليك و خففت من ثقل الضربي لان انتي تارك الشي المو مهم يعني اهملت الشي اللي قليل ما يجي منو اسئلة واذا اجا بتكون نسبتو قليلة او علاماتو قليلة بس المهم ما يسويلك عدد المسائل رهاب وخوف لا ابدا اقرأ ع قدرتك كل دقيقة زيادي دراسي هيا بحصيلتك لهيك لا تفكر شأد عليك كمية دراسة بلش اشتغل فيا وشوف كيف رح تخف الكمية وتنبسط انك عم تأنجز وتكمل انجاز) وملاحظة في من هدول مسائل صعبات كتير كتير والاساتذي ما بتشرحها احيانا هاي انتي اذا ضل معك وقت اقراهون ما ضل معك خلص واذا ما فهمتون عادي خلص لا تضيع وقتك عليون اذا كان عندك واجب أخر اهم منون *بنرجع للاولويات كتير مهمة الاولويات يا جماعة * لا تكتئب لان نسبتون قليلي و نسبة جيتون بالفحص كتير قليلي وفي كمان من هدول مسائل طوال كتير وعم يدورو حول فكرة وحدي يعني ما ممكن تنصاغ هل مسألي ع شكل طلبات هدول كمان خلون لاخر شي واقروهون اذا فهمتون الحمد لله مشي حالها ما فهمتها والله مو مشكلي شوف اولوياتك اذا مخلص المهمات عادي ابحث عن هي ولا تتركها اما اذا تارك المهم فحرام ضيع وقتك عليون

🤞النوع التاني : المسائل والتمارين المتشابهة هي لازم تكونو خلال السني حددتون انو هي المسألي اخت هي وهي اخت هي مثلا ومثال من عندي لان نسيت المنهاج بكتب جمب المسألة 15 ص 200 :[هي أخت المسألي 20 ص 160] وبرجع بكتب جمب المسألي 20 ص 260 انو مسألي 15 اختها منشان بس اجي ادرس ما ادرس مسألتين او وحدي ركز عليا والتاني قراءة بس منشان المراجعة وع فكرة في كتير مسائل وتمارين متشابهة هي مهمة لتوفير الوقت وتركيز المعلومي و حل التمرين باكتر من طريقة مع العلم لازم تفهموا كل الطرق لان بجوز يصيغولكون طلبات حول طريقة وحدي ويتركوا باقي الطرق يعني يقيدوكون بطريقة من خلال الطلبات بالمسألي بالامتحان فديروا بالكون

النوع التالت👌: ( أهم شي )المسائل اللي بحلوها اساتذتكون هي المسائل مهمة اكيد لان الاساتذي بركزوا عليا و بتكون امتحانية يعني خرج تجي بالامتحان هي مهمي ولازم نعرف كيف ندرسها وطريقة دراستا كالتالي ( اول شي انا بفهم كيف شرحا الاستاذ و كل خطوي كيف عملا وليش واسألوا الاستاذ لا تستحوا  انا كنت مشيبو لاستاذي الله يذكروا بالخير و يجزيه الخير يا رب بس كان يشجعنا انو نسأل ونفهم لأن السؤال الخطوة الأولى للفهم واذا كان الاستاذ شوي معقدها اسألوا زملائكون  اكيد بفيدوكون لان ممكن انتي تفهم فكرة زميلك ما يفهمها والعكس صحيح فبتساعدوا بعض هلا بعدين برجع ع البيت بدرس النظري و بجي لحل التمرين اللي حللنا ياه الاستاذ اليوم بلمدرسي بحلو اول شي عن غيب (منشان شوف شو فهمت ورا الاستاذ و نشط ذاكرتي كونو فهم يعني نسبة ثباتو بالذاكرة اكبر )وبصحح منشان انتبه ع الشغلات اللي خربطت فيا و اللي نسيتا من الشرح ومنشان اعرف لي خربطت فيا و افهم وبرجع بحلا لحالي واهم شي كل ما واجهتكون مشكلي اسألوا لا تسكتوا اسألوا

 ♡بالنسبة #لمراجعة_المسائل : اولا براجع المسائل الهامي والصعبي واللي غالبا بخربط فيا بشكل كامل اما بحلا كلها او بقراها كلا اما المسائل الهامي و السهلي واللي ما كنت تخربط فيا بس بتراجع الفكرة او طريقة الحل يعني تحكي انو هي هيك هيك هيك بنحلها وخالصين مافي داعي ترجع تحلا اذا شفت انك خاتما و بالنسبي للمسائل المو مهمات هي اخر شي بنراجعون ع شكل قراءة او ترسيخ الفكرة

♡ملااااحظة هااااامة : كتير طلاب عم تشكي انو عم تفهم ع الاساتذي بس لما ترجع تحل بالبيت ما عم تعرف هلا عندك سببين▪︎ الاول مانك مركز مع الاستاذ تمام بتكون فاتح شي سيرة بنص المسألي او شردت او هيك فخفف منون هدول وخاصة بحصص الرياضيات

▪︎التاني انك مأهمل النظري ع الاخر وما عم تحفظوا او تدرسو بشكل جيد فما عم تفهم شو عم يصير بالمسائل وليش الخطوات هيك عم تنحل فلازم تنتبه للنظري وتفهموا منيح لتنطلق بالمسائل

☆ملاحظة كمان : من المهم جدا جدا جدا انو تعيد المسألي اكتر من مرة لتحفظ خطواتا ويترسخ فهمها براسك و بالاخير اهم شي ترسخ الفكرة لان هي الاساس

 

 

☆وكمان ملاحظة : بالنسبي للمسائل اللي بتعصلج معكون اقروا قراءة مرتين تلاتي وحاولوا تفهموا كيف عم تنتقلوا من خطوة لخطوة وااذا مشي الحال حلوها عن غيب وصححوا وشوفو الاخطاء صلحوها ما مشي الحال اتركوها وارجعولا بس حدي يساعدكون او ترتاحوا

والسلام عليكم ❤️

بعتذر عن الاطالي بس كان بدها

ولا تنسونا من صالح دعائكم💚

🍃🍃بالتوفيق للجميع 🍃🍃